Փակում ենք դուռը ռուսների առաջ. Հունգարիայի պաշտպանության նախարար

Հունգարիայի պաշտպանության նախարար Ռոմուլուս Ռուզին-Սենդին հայտարարել է, որ երկիրը պետք է վերականգնի վստահությունն իր դաշնակիցների հետ, իսկ Ռուսաստանի առաջ դուռը փակվում է:

Տեղական լրատվամիջոցների փոխանցմամբ՝ Հունգարիայի պաշտպանության նախարար Ռոմուլուս Ռուզին-Սենդին նշել է. «Հունգարիան պետք է վերականգնի վստահությունն իր դաշնակիցների հետ, իսկ ինչ վերաբերում է Ռուսաստանին, մենք նրանց առաջ դուռը փակում ենք»։

Նախարարը հավելել է, որ նոր կառավարությունը ռազմավարություն մշակելիս պարտավոր է հաշվի առնել ինչպես սեփական երկրի, այնպես էլ նրա դաշնակիցների արժեքներն ու շահերը: Ըստ նրա՝ Հունգարիայի և դաշնակիցների շահերը համընկնում են, և նրանց հանդեպ վստահության վերականգնումն անհրաժեշտություն է։

Հենց այս պատճառով կառավարության գլխավոր առաջնահերթություններից մեկը դարձել է որոշ դաշնակիցներից, հատկապես ֆիններից ներողություն խնդրելը, քանի որ նախորդ կառավարությունը հետաձգել էր նրանց անդամակցությունը ՆԱՏՕ-ին։ Ռոմուլուս Ռուզին-Սենդին շեշտել է, որ որպես զինվորական՝ ինքն անընդունելի է համարում նախորդ վարչակազմի որդեգրած դիրքորոշումը։

«Մենք փակում ենք դուռը ռուսների առաջ»,- փաստել է պաշտպանական գերատեսչության ղեկավարը՝ հստակեցնելով, որ ռուսական հետախուզությունը «փորձում էր ներթափանցել հետնամուտքով»։