Զելենսկու աղմկահարույց հայտարարությունը․ թիրախավորվել են Ռուսաստանի կարևոր ռազմական օբյեկտները

Ուկրաինայի նախագահ Վլադիմիր Զելենսկին հայտարարել է, որ ուկրաինական պաշտպանական ուժերը հերթական հարվածներն են հասցրել Ռուսաստանի տարածքում գտնվող մի շարք ռազմական և ռազմավարական նշանակության օբյեկտների, այդ թվում՝ Տյումենի նավթավերամշակման գործարանին, Կիրովի մարզում ռազմական նշանակության օբյեկտին, Եկատերինբուրգի լոգիստիկ կենտրոնին և Դոնի Ռոստովի վառելիքա-քսուքային գործարանին։

Զելենսկին իր տելեգրամյան հարթակում գրել է.«Երեկ երեկոյան մեր պաշտպանական ուժերը հարվածներ են հասցրել Ռուսաստանի տարբեր շրջաններում գտնվող թիրախներին, որոնք նպաստում են այս պատերազմին՝ հավելելով, որ Կիրովի թիրախը գտնվում է Ուկրաինայի սահմանից շուրջ 1200 կմ հեռավորության վրա և մատակարարում է բաղադրիչներ ռուսական սպառազինության համար։ Գրառմանը նա կցել է արդյունաբերական օբյեկտներում բռնկված հրդեհների տեսանյութեր»:

Ավելի վաղ Տյումենի մարզպետ Ալեքսանդր Մուրը հայտնել էր Տյումենի նավթավերամշակման գործարանի վրա հարձակման մասին, իսկ Wildberries ընկերությունը հաստատել էր, որ անօդաչու թռչող սարքը հարվածել է իր լոգիստիկ կենտրոնի հարակից կայանատեղիին։

Միևնույն ժամանակ, Ռոստովի մարզի նահանգապետ Յուրի Սլյուսարը հայտնել է, որ Դոնի Ռոստովի վրա հարձակման հետևանքով զոհվել է չորս մարդ։ Նրա խոսքով՝ վնասվել են նաև բնակելի շենքեր, մասնավոր տներ, կառուցվող բազմահարկեր, առևտրային օբյեկտներ և պահեստներ։

Ինչ վերաբերում է Կիրովին, ապա մարզի նահանգապետ Ալեքսանդր Սոկոլովը հայտնել է միայն հուլիսի 24-ի գիշերը տեղի ունեցած մեկ հարձակման մասին։ Երկրորդ հարվածի վերաբերյալ պաշտոնական տեղեկություններ չեն հրապարակվել։ Ըստ նրա՝ այդ հարձակման հետևանքով զոհվել է հինգ, վիրավորվել՝ ավելի քան 30 մարդ։