Պակիստանում մահապարտի հարձակումը 14 մարդու կյանք է խլել

Պակիստանի հյուսիս-արևմուտքում գտնվող անցակետի վրա իրականացված մահապարտի ահաբեկչական հարձակման հետևանքով զոհվել է առնվազն 14 մարդ, հայտնում է «Սինհուա» գործակալությունը՝ հղում անելով երկրի անվտանգության ծառայություններին։

Նախնական տվյալներով՝ միջադեպը տեղի է ունեցել Տանկ շրջանում։ Բարձր արագությամբ ընթացող ավտոմեքենան բախվել է անցակետին, որից հետո տեղի է ունեցել հզոր պայթյուն, որն ամբողջությամբ ավերել է օբյեկտը։

Զոհերի թվում են ինը զինծառայող, ոստիկանության չորս աշխատակից և անտառային վարչության մեկ ներկայացուցիչ։ Եվս առնվազն 24 մարդ տարբեր աստիճանի վնասվածքներ է ստացել, որոնց մեծ մասը զինվորականներ են։

Բոլոր տուժածները տեղափոխվել են հիվանդանոցներ։ Փրկարարները շարունակում են փլատակների ապամոնտաժման աշխատանքները, քանի որ ենթադրվում է, որ դրանց տակ կարող են մնացած լինել ևս երեք զինծառայող։

Պայթյունից հետո անվտանգության ուժերը վնասազերծել են երեք զինյալի։ Մինչ այս պահը հարձակման պատասխանատվությունը որևէ ծայրահեղական խմբավորում չի ստանձնել։