Ղրիմից Ուկրաինայի ուղղությամբ հարվածների թիվը նվազել է 7 անգամ

Ղրիմից Ուկրաինայի ուղղությամբ հարվածների թիվը նվազել է յոթ անգամ։ DW-ի հետ զրույցում նման գնահատական է հայտնել Ղրիմի զբոսաշրջության նախկին նախարար Ալեքսանդր Լիևը։

Նրա խոսքով՝ Ռուսաստանը թերակղզին սկզբից ևեթ օգտագործել է որպես ռազմական հենակետ.

«Ավելի քան չորս տարի թերակղզու տարածքից ամսական իրականացվում էր 30-40 հարձակում՝ «Շահեդ» ԱԹՍ-ների և «Ցիրկոն» ու այլ տեսակի հրթիռների կիրառմամբ»,- նշել է Լիևը՝ հավելելով, որ հարվածները հիմնականում հասցվում էին Չաուդա հրվանդանից, Բելբեկ օդանավակայանից և Սակիի շրջանից։

Լիևի փոխանցմամբ՝ վերջին ամիսներին Ուկրաինայի զինված ուժերը սկսել են հարվածներ հասցնել Ղրիմի ռազմական ենթակառուցվածքներին։ Նա ընդունել է, որ դրա հետևանքով վատթարացել է նաև տեղի բնակիչների կյանքի որակը (կան էլեկտրաէներգիայի, ջրի, ինտերնետի և կոմունալ խնդիրներ), սակայն պնդել է, որ այդ մարտավարությունն արդյունք է տվել։

«Վերջին երկու ամսում Ղրիմի տարածքից Ուկրաինայի ուղղությամբ իրականացվել է ընդամենը 11 հարձակում։ Այսինքն՝ դա տվել է իր էֆեկտը»,- ամփոփել է նա։