ԱԹՍ-ների հարձակում Սանկտ Պետերբուրգում․ վնասվել են Wildberries-ի պահեստներն ու քաղաքացիական ենթակառուցվածքներ

Հուլիսի 24-ի առավոտյան անօդաչու թռչող սարքերը հարձակվել են Սանկտ Պետերբուրգի և Լենինգրադի մարզի օբյեկտների վրա։

Հարվածների տակ են հայտնվել Wildberries ընկերության առնվազն երկու լոգիստիկ համալիրները՝ Շուշարիում և Նովոսարատովկայում («Ուտկինա Զավոդ»): Երկու վայրերում էլ հրդեհ է բռնկվել, իսկ աշխատակիցները հեռացվել են տարածքից։ Wildberries-ն պաշտոնապես հաստատել է երկու կենտրոնների աշխատանքի դադարեցումը։

Նախնական տվյալներով՝ «Ուտկինա Զավոդ» արդյունաբերական գոտում այրվում է նաև Ozon-ի պահեստը։

 Սանկտ Պետերբուրգի նահանգապետ Ալեքսանդր Բեգլովը հայտնել է, որ ԱԹՍ-ները հարվածել են Մոսկովյան խճուղում գտնվող քաղաքացիական ենթակառուցվածքային օբյեկտներին։

 Լենինգրադի մարզի նահանգապետ Ալեքսանդր Դրոզդենկոն հաստատել է Նովոսարատովկայում Wildberries-ի պահեստին հասցված հարվածը, որի հետևանքով տուժել է 3 մարդ։

 Այլ օբյեկտներ․ Հարձակման է ենթարկվել նաև Սինյավինոյում գտնվող «Սևերնայա» թռչնաֆաբրիկայի պահեստային համալիրը, որտեղ փլուզվել է շինություններից մեկը (տուժածներ չկան)։

Հարձակման պատճառով «Պուլկովո» օդանավակայանում հապաղել է շուրջ 50 չվերթ, իսկ ևս 15 ինքնաթիռ ուղղորդվել է դեպի այլ օդանավակայաններ։