Վրաստանը պատրաստվում է վերականգնել դիվանագիտական հարաբերությունները ՌԴ-ի հետ. Սաակաշվիլի

Վրաստանի նախկին նախագահ Միխեիլ Սաակաշվիլին հայտարարել է, որ երկրի իշխանությունները, իր պնդմամբ, պատրաստվում են Ռուսաստանի հետ դիվանագիտական հարաբերությունների վերականգնմանը։ Այս մասին նա գրել է սոցիալական ցանցերում։

«Նրանք ծրագրում են համաձայնագիր ստորագրել Ռուսաստանի հետ, վերականգնել դիվանագիտական հարաբերությունները և ստեղծել հակաարևմտյան դաշինք, ինչպես նաև ուժի չկիրառման մասին համաձայնագիր ստորագրել Աբխազիայի և Ցխինվալիի իշխանությունների հետ»,- գրել է Սաակաշվիլին։

Նրա պնդմամբ՝ Վրաստանը նաև կարող է չեզոքության մասին հռչակագիր ընդունել։

Օգոստոսի 13-ին Վրաստանի խորհրդարանի տարածաշրջանային քաղաքականության հանձնաժողովի նախագահ, իշխող «Վրացական երազանք» կուսակցության առաջնորդներից Իրակլի Քադագիշվիլին հայտարարել էր, որ ռուսատյացության դրսևորումները Մոսկվայի և Թբիլիսիի միջև առճակատման վտանգ են ստեղծում, ինչից Վրաստանը կարող է լրջորեն տուժել։

Ավելի վաղ Վրաստանի վարչապետ Իրակլի Կոբախիձեն հայտարարել էր, որ վրաց և ռուս ժողովուրդները չպետք է թույլ տան, որ երկու երկրների միջև քաղաքական տարաձայնությունները վերածվեն ժողովուրդների միջև թշնամանքի։

Միևնույն ժամանակ Կոբախիձեն նախկինում խոսել էր նաև ներկայիս պայմաններում Ռուսաստանի հետ դիվանագիտական հարաբերությունների վերականգնման անհնարինության մասին։