Շառլ Ազնավուրի «Les plus belles chansons» ժողովածուն Ֆրանսիայում «ոսկե» կարգավիճակ է ստացել

Ֆրանսահայ աշխարհահռչակ շանսոնյե Շառլ Ազնավուրի «Les plus belles chansons» («Ամենագեղեցիկ երգերը») ժողովածուն Ֆրանսիայում պաշտոնապես ստացել է «ոսկե» կարգավիճակ։

Ֆրանսիայի ձայնագրման ազգային սինդիկատը (SNEP) հավաստագրումը շնորհել է այն բանից հետո, երբ ալբոմը գերազանցել է վաճառքի 50 հազար համարժեք միավորի շեմը։ Այդ ցուցանիշում հաշվարկվում են ինչպես ֆիզիկական օրինակների վաճառքը և ներբեռնումները, այնպես էլ առցանց հարթակներում լսումները։

Barclay լեյբլի թողարկած ժողովածուն հասանելի է դարձել 2025 թվականի սեպտեմբերի 26-ին։ Թվային տարբերակում ընդգրկված է 43 ստեղծագործություն՝ շուրջ 2 ժամ 27 րոպե ընդհանուր տևողությամբ։

Ժողովածուում ներառված են Ազնավուրի ամենահայտնի ստեղծագործություններից «La Bohème»-ը, «Emmenez-moi»-ն, «Hier encore»-ը, «La Mamma»-ն, «She»-ն, «Il faut savoir»-ը և «For Me… Formidable»-ը։

Թողարկման շրջանակում ներկայացվել են նաև Ազնավուրի անձնական արխիվից հայտնաբերված նախկինում չհրապարակված ձայնագրություններ, այդ թվում՝ Ռեյ Չարլզի հետ 1970-ականների կեսերին ձայնագրված «La Mamma»-ն և Դալիդայի հետ կատարված «Quand on s’aime» զուգերգը։

Ալբոմի «ոսկե» կարգավիճակը ևս մեկ անգամ ընդգծում է, որ Շառլ Ազնավուրի երաժշտական ժառանգությունը շարունակում է մեծ հետաքրքրություն վայելել Ֆրանսիայում։