ԱՄՆ-ն գործընկերներին կպահանջի ընտրություն կատարել ԱԲ մրցավազքում՝ Վաշինգտոնի և Պեկինի միջև

ԱՄՆ-ը պատրաստվում է տասնյակ երկրների հորդորել կողմնորոշվել Չինաստանի հետ արհեստական բանականության ոլորտում մրցակցության հարցում՝ զգուշացնելով, որ Պեկինի նախաձեռնությանը միացող երկրները կարող են դուրս մնալ Վաշինգտոնի գլխավորած ԱԲ կոալիցիայից։ Այս մասին հայտնում է Reuters-ը՝ հղում անելով ամերիկացի պաշտոնյայի և իր տրամադրության տակ հայտնված փաստաթղթի նախագծին։

Վաշինգտոնը նախորդ տարի գործարկել է Pax Silica նախաձեռնությունը, որի նպատակն է ապահովել ԱԲ մոդելների, կիսահաղորդիչների և կարևոր հանքանյութերի մատակարարման շղթաները։ Նախաձեռնությանը միացել է շուրջ երկու տասնյակ երկիր, այդ թվում՝ Ճապոնիան, Ավստրալիան, Հարավային Կորեան և Ղազախստանը։

Reuters-ի տվյալներով՝ ԱՄՆ Պետդեպարտամենտի պատրաստած նամակը նախատեսվում է ուղարկել հունիսին ստորագրված «AI Opportunity Statement»-ին միացած 35 երկրներին։ Դրանում երկրներին կոչ է արվում «գիտակցված ընտրություն» կատարել և նշվում, որ Pax Silica-ին անդամակցությունը չի կարող համատեղվել մրցակցող նախաձեռնությունների մասնակցության հետ։

Հուլիսին Չինաստանի նախագահ Սի Ծինփինը ներկայացրել է «Արհեստական բանականության համաշխարհային համագործակցության կազմակերպությունը»՝ որպես ԱՄՆ-ի ազդեցությանը մրցակցող նախաձեռնություն։ Ղազախստանն առայժմ միակ հայտնի երկիրն է, որը միացել է ինչպես ամերիկյան, այնպես էլ չինական նախաձեռնություններին։

Ամերիկացի պաշտոնյան Reuters-ին ասել է, որ Վաշինգտոնը ցանկանում է գործընկերներին հստակ հասկացնել՝ «երկուսը միաժամանակ հնարավոր չէ»։ ԱՄՆ-ի նպատակն է իր դաշնակիցների և գործընկերների հետ ձևավորել միասնական տեխնոլոգիական էկոհամակարգ և նվազեցնել Չինաստանից կախվածությունը կարևոր հանքանյութերի, ԱԲ մոդելների և կիսահաղորդիչների ոլորտներում։

Reuters-ը նշում է, որ դեռ պարզ չէ, թե երբ է ԱՄՆ-ը պատրաստվում ուղարկել նամակը, և արդյոք դրա բովանդակությունը մինչ այդ կփոփոխվի։