Ուկրաինան ԱԹՍ-ներով հարվածել է Wildberries-ի լոգիստիկ կենտրոնին. 7 մարդ է զոհվել

Ռուսաստանի Տամբովի մարզի Կոտովսկ քաղաքում գտնվող Wildberries-ի լոգիստիկ կենտրոնը հուլիսի 18-ի գիշերը ենթարկվել է ուկրաինական անօդաչու թռչող սարքի հարձակման։ Այս մասին հայտնել է մարզի նահանգապետ Եվգենի Պերվիշովը։

Նրա խոսքով՝ հարվածի հետևանքով զոհվել է գիշերային հերթափոխի 7 աշխատակից, ևս 24 մարդ վնասվածքներ է ստացել։ Տուժածները տեղափոխվել են Կոտովսկի և Տամբովի հիվանդանոցներ։

Հարվածից հետո լոգիստիկ կենտրոնում հրդեհ է բռնկվել։ Բաց կրակը մարվել է, սակայն հրդեհաշիջման աշխատանքները շարունակվում են։ Նահանգապետը հայտնել է, որ օգնություն կտրամադրվի զոհվածների ընտանիքներին։

Wildberries-ը հաստատել է, որ հարձակման են ենթարկվել Կոտովսկի և Մոսկվայի մարզի Էլեկտրոստալի լոգիստիկ կենտրոնները։ Ընկերության տվյալներով՝ երկու օբյեկտներից էլ աշխատակիցները տարհանվել են։

Ռուսական կողմի տվյալներով՝ նույն գիշեր Ուկրաինան հարյուրավոր անօդաչու թռչող սարքեր է կիրառել Ռուսաստանի տարբեր շրջանների ուղղությամբ։ Հարվածներ են գրանցվել նաև Լենինգրադի և Ռոստովի մարզերում, ինչպես նաև Վոլգոգրադում և Զապորոժիեի Էներգոդար քաղաքում։ Ռուսաստանի իշխանությունները հայտնում են, որ անօդաչուների մեծ մասը խոցվել է հակաօդային պաշտպանության ուժերի կողմից