Իրանը հրթիռներ է արձակել Հորմուզի նեղուցով անցնող առևտրային նավերի ուղղությամբ

Իրանի զինված ուժերը երկուշաբթի երեկոյան առնվազն երկու հրթիռ են արձակել Հորմուզի նեղուցով անցնող առևտրային նավերի ուղղությամբ։ Այս մասին հայտնում է Axios-ը՝ հղում անելով ամերիկացի երկու պաշտոնյաների։

Աղբյուրների փոխանցմամբ՝ հարվածների հետևանքով երկու առևտրային նավ զգալի վնասներ են կրել, սակայն տուժածներ չկան։

Տեղի ունեցածը կարող է վտանգի տակ դնել երեք շաբաթից էլ քիչ առաջ ստորագրված փոխըմբռնման հուշագիրը, որի համաձայն Իրանը համաձայնել էր դադարեցնել Հորմուզի նեղուցում նավերի վրա հարձակումները։

Պարբերականի գնահատմամբ՝ ԱՄՆ-ն, ամենայն հավանականությամբ, պատասխան հարվածներ կհասցնի իրանական ռազմական օբյեկտներին։

Ավելի վաղ Մեծ Բրիտանիայի Ծովային առևտրային գործողությունների վարչությունը (UKMTO) հայտնել էր, որ Հորմուզի նեղուցի մերձակայքով՝ դեպի Օմանի ծոց ընթացող տանկերը խոցվել է անհայտ արկով։

UKMTO-ի տվյալներով, Interfakc-ի փոխանցմամբ՝ միջադեպը տեղի է ունեցել Օմանի Լիմա բնակավայրից մոտ ութ ծովային մղոն դեպի արևելք։ Արկը դիպել է տանկերի ձախ մասին, ինչի հետևանքով հրդեհ է բռնկվել։

Գերատեսչության տեղեկություններով՝ զոհեր և շրջակա միջավայրին հասցված վնասներ չկան։ Դեպքի առթիվ հետաքննություն է իրականացվում։