Ռուսաստանը հարվածել է Կիևին․ կա առնվազն 9 զոհ, տասնյակ վիրավորներ, որոնց թվում՝ երեխաներ

Ռուսական բանակը հարված է հասցրել Կիևին, որի հետևանքով, նախնական տվյալներով, զոհվել է առնվազն 9 մարդ, ևս 46-ը վիրավորվել են։ Այդ մասին հայտնել է Կիևի քաղաքային վարչակազմի ղեկավար Տիմուր Տկաչենկոն։

Վիրավորների թվում 5 երեխա կա։

Ուկրաինայի փրկարար ծառայության տվյալներով՝ քաղաքի Պոդոլսկի շրջանում վնասվել է 9-հարկանի բնակելի շենք, որտեղ ավերածություններն ընդգրկել են 9-րդից մինչև 5-րդ հարկերը։

Բացի այդ, փրկարարները շարունակում են որոնողափրկարարական աշխատանքները նաև 21-հարկանի բնակելի շենքում, որտեղ փլուզվել են 2-րդից 5-րդ հարկերը։

Քաղաքի տարբեր հատվածներում գրանցվել են նաև բեկորների ընկնելու դեպքեր և հրդեհներ։ Որոնողափրկարարական աշխատանքները շարունակվում են։