Ընտանեկան բռնության դեպքերի մասին հաղորդումներն ավելացել են

Հայաստանում ընտանեկան բռնության դեպքերի մասին հաղորդումների թիվն աճել է։ Այս մասին 2026 թվականի առաջին կիսամյակի արդյունքներն ամփոփող ասուլիսում հայտնել է ՆԳ նախարարի տեղակալ Արմեն Մկրտչյանը։

Նրա խոսքով՝ անցած տարի և 2026 թվականի առաջին 6 ամիսներին ընտանեկան բռնության դեպքերի աճը հիմնականում պայմանավորված է նրանով, որ բռնության ենթարկված անձինք ավելի հաճախ են դիմում ոստիկանություն։

«Սա վկայում է դրական երևույթի մասին, որ ոստիկանության նկատմամբ կա վստահություն և բռնության ենթարկված անձինք դիմում են ավելի շատ, քան նախկինում»,- ասել է Մկրտչյանը։

Փոխնախարարը նշել է, որ ընտանեկան բռնության դեմ պայքարի ոլորտում, այդ թվում՝ դատաիրավական համակարգում, որոշ խնդիրներ են արձանագրվել։ Դրանք, ըստ նրա, ներկայացվում են դատախազությանն ու իրավապահ համակարգի մյուս գործընկերներին։

Մկրտչյանի խոսքով՝ առաջիկայում նախատեսվում է նաև ներկայացնել օրենսդրական առաջարկներ։

Արմեն Մկրտչյանն անդրադարձել է նաև ճանապարհային անվտանգության վիճակագրությանը։

Նրա խոսքով՝ արդեն 2,5 տարի է՝ Հայաստանում ավտովթարների հետևանքով զոհերի թիվը նվազում է։

«Արդեն 2,5 տարի է, որ ճանապարհատրանսպորտային պատահարների հետևանքով զոհերի թիվը Հայաստանի Հանրապետությունում նվազում է, սա շատ մեծ ձեռքբերում է, այս աշխատաոճը պետք է շարունակել ու պահպանել»,- ասել է փոխնախարարը։

Նա նշել է, որ Պարեկային ծառայությունը շարունակում է զարգանալ և դեր ունի ոչ միայն ճանապարհային երթևեկության անվտանգության, այլև հանցագործությունների հայտնաբերման գործում։

Փոխնախարարը խոսել է նաև քրեական ոստիկանության աշխատանքների մասին՝ ընդգծելով համացանցում հանցագործությունների կանխարգելման և բացահայտման անհրաժեշտությունը։

Նրա խոսքով՝ ոստիկանությունը պետք է օգտագործի նաև թվային և տեխնոլոգիական գործիքներ։

Մկրտչյանը հայտնել է, որ առաջիկայում Հայաստանում կստեղծվի կիբերլաբորատորիա։ Նրա խոսքով՝ այն հնարավորություն կտա բարձրացնել համացանցային և թվային հանցագործությունների դեմ պայքարի արդյունավետությունը։