ԱՄՆ-ում մտավախություն են ունեն, որ Իսրայելը կարող է թիրախավորել իրանցի բարձրաստիճան բանակցողներին

ԱՄՆ նախագահ Դոնալդ Թրամփի վարչակազմում մտավախություն են ունեցել, որ Իսրայելը կարող է ծրագրել Իրանի բարձրաստիճան ներկայացուցիչների սպանությունը։ Այս մասին հայտնում է The New York Times-ը։

Թերթի տեղեկություններով՝ Վաշինգտոնը Իրանի հետ բանակցությունների սկզբնական փուլում տեղեկացել է, որ հնարավոր թիրախների թվում եղել է նաև Իրանի Մեջլիսի նախագահ Մոհամմադ Բաղեր Ղալիբաֆը։ Այդ պատճառով ԱՄՆ-ն իսրայելական կողմին խնդրել է ձեռնպահ մնալ նրա դեմ որևէ գործողությունից։ Հրապարակման գնահատմամբ՝ այս հանգամանքը ցույց է տալիս, որ Վաշինգտոնի և Թել Ավիվի մոտեցումները Իրանի դեմ գործողությունների հարցում ամբողջությամբ համընկնող չեն եղել։

Նյութում նշվում է նաև, որ Իրանի ներկայացուցիչները ԱՄՆ-ի հետ նախատեսված բանակցություններից առաջ Վաշինգտոնից երաշխիքներ են պահանջել, որ Իսրայելը գաղտնի գործողություններ չի իրականացնի իրենց պատվիրակության դեմ։

Պակիստանից Իրան վերադառնալու ճանապարհին Իրանի անվտանգության ծառայությունները տեղեկություն են ստացել, որ Իսրայելը կարող է հարված հասցնել այն ինքնաթիռին, որով տեղափոխվում էր Մեջլիսի նախագահ Մոհամմադ Բաղեր Ղալիբաֆը։ Նշվում է, որ այդ տեղեկությունից հետո օդանավը վայրէջք է կատարել մոտակա օդանավակայանում, իսկ պատվիրակությունը մինչև Թեհրան հասել է ցամաքային ճանապարհով,  փոխելով  վերադարձի երթուղին։