Ուկրաինական ԱԹՍ-ները հարվածել են Ռուսաստանի խոշորագույն նավթավերամշակման գործարաններից մեկը

Ուկրաինան հուլիսի 2-ի գիշերը անօդաչու թռչող սարքերով հարվածներ է հասցրել ՌուսաստանիՆիժնի Նովգորոդի մարզին: 

Հակաօդային պաշտպանության ուժերը խոցել են 30 անօդաչու սարք, սակայն դրանց բեկորների հետևանքով վնասվել են արդյունաբերական օբյեկտ և մի քանի բնակելի տուն։

Պաշտոնական տվյալներով՝ հարձակման հետևանքով մեկ մարդ զոհվել է, ևս չորսը տարբեր աստիճանի վնասվածքներ են ստացել։

Հարձակման հիմնական թիրախը եղել է «Լուկոյլ-Նիժեգորոդնեֆտեօրգսինթեզ» նավթավերամշակման գործարանը։ Այն համարվում է Ռուսաստանի հզորությամբ չորրորդ և բենզինի արտադրության ծավալներով երկրորդ խոշոր նավթավերամշակման գործարանը։

Լրատվական գործակալության Reuters-ի տվյալներով՝ հունիսի 24-ի գիշերը ուկրաինական անօդաչուների նախորդ հարձակումից հետո գործարանն արդեն ստիպված էր ժամանակավորապես դադարեցնել նավթի վերամշակումը։ Ավելի վաղ այն դադարեցրել էր աշխատանքը նաև մայիսին՝ ԱԹՍ-ների հարվածներից հետո։

Նախնական տեղեկություններով՝ վերջին հարձակման հետևանքով գործարանի աշխատանքը կրկին կարող է ժամանակավորապես դադարեցվել։