«Ռոսատոմ»-ը Հայաստանին առաջարկում է կառուցել մեծ կամ միջին հզորության ատոմակայան

Ռուսական «Ռոսատոմ» պետական կորպորացիան Հայաստանին առաջարկում է կառուցել մեծ կամ միջին հզորության ատոմային էլեկտրակայան, որը երկար տարիներ կապահովի երկրի էլեկտրաէներգիայի պահանջարկը։ Այս մասին լրագրողների հետ զրույցում հայտարարել է «Ռոսատոմ»-ի գլխավոր տնօրեն Ալեքսեյ Լիխաչովը։

«Մենք կարծում ենք, որ Հայաստանն արդեն այսօր պետք է պատրաստվի ապագա էներգետիկ պահանջներին։ Մեր առաջարկը մեծ կամ միջին հզորության ատոմակայանն է՝ մեկ կամ երկու էներգաբլոկով, որը տասնամյակներ շարունակ կփակի երկրի սպասվող էլեկտրաէներգիայի պակասը»,- նշել է Լիխաչովը։

Նրա խոսքով՝ ներկայումս Հայաստանում արտադրվող էլեկտրաէներգիայի շուրջ 30 տոկոսն ապահովվում է ատոմային էներգետիկայի հաշվին։

Լիխաչովը չի բացառել, որ առաջիկա տասնամյակներում Հայաստանում էլեկտրաէներգիայի դեֆիցիտը կարող է հասնել մինչև 1 գիգավատի։ Նրա գնահատմամբ՝ զարգացած ատոմային արդյունաբերությունը զարգացած տնտեսության և արդյունաբերության կարևոր ցուցանիշներից է։

Ռուսական կողմի այս առաջարկը հնչում է այն ժամանակ, երբ Հայաստանը և Ռուսաստանը շարունակում են համագործակցությունը էներգետիկ ոլորտում։ Մասնավորապես, երկու երկրների վարչապետները հանդիպել են Եկատերինբուրգում անցկացվող «Իննոպրոմ» միջազգային արդյունաբերական ցուցահանդեսի շրջանակում, որտեղ քննարկվել են նաև տնտեսական և արդյունաբերական համագործակցության հարցեր։