Մեծ Բրիտանիայում` աղբավայրում հայտնաբերվել են գաղտնի ռազմական փաստաթղթեր

Բրիտանական բանակի ամենախոշոր կայազորի գաղտնի ռազմական փաստաթղթերը հայտնաբերվել են մոտակա աղբավայրում, ինչի կապակցությամբ պաշտպանական գերատեսչության ղեկավարները հետաքննություն են իրականացնում։

«Սան» թերթը հայտնում է, որ իրադարձությունը վերաբերում է Անգլիայի հյուսիսում՝ Յորքշիր կոմսությունում գտնվող Քաթերիկ կայազորին, որտեղ տեղակայված է ավելի քան 10 հազար զինծառայող, և որը ծառայում է որպես բազա թագավորական հրետանու 5-րդ գնդի ու 32-րդ ինժեներական գնդի համար։

Ըստ հրապարակման՝ դեն նետված փաստաթղթերում առկա են զինվորականների անուններն ու կոչումները, բազայում պահվող զենքի և պահակախմբի հերթափոխի վերաբերյալ տեղեկություններ, անվտանգության կանոնների խախտումների տվյալներ, ինչպես նաև տագնապի ազդանշաններին արձագանքման արձանագրություններ։ Թղթերի մեծ մասը թվագրված են 2018, 2021 և 2023 թվականներով։