ԱԺ նախագահ ընտրվելու դեպքում չեմ լինի Հայաստան-Թուրքիա կարգավորման գործընթացում ՀՀ ներկայացուցիչ․ Ռուբինյան

ԱԺ նախագահի թեկնածու Ռուբեն Ռուբինյանը հայտարարել է, որ Ազգային ժողովի նախագահ ընտրվելու դեպքում այլևս չի շարունակելու Հայաստանի հատուկ ներկայացուցչի լիազորությունները Հայաստան-Թուրքիա կարգավորման գործընթացում։

Լրագրողների հետ զրույցում նա նշել է, որ ՔՊ վարչությունն առաջադրել է իր թեկնածությունը ԱԺ նախագահի պաշտոնում, իսկ մինչև ընտրությունը շարունակում են գործել ներկայիս ԱԺ նախագահն ու աշխատակազմը, ուստի կադրային փոփոխությունների մասին խոսելը վաղաժամ է։

Անդրադառնալով այն պնդումներին, թե իր թեկնածության առաջադրման մեջ «Թուրքիայի մատն» է խառն՝ Ռուբինյանը դրանք անվանել է անհիմն։ Նա հիշեցրել է, որ շնորհավորանքներ է ստացել ոչ միայն Թուրքիայի հատուկ ներկայացուցիչ Սերդար Քըլըչից, այլև Ռուսաստանի և այլ երկրների գործընկերներից։

«Եթե ինձ ընտրեն ԱԺ նախագահ, ակնհայտորեն այլևս չեմ լինելու Թուրքիայի հետ բանակցություններում Հայաստանի հատուկ ներկայացուցիչը։ Հետևաբար, այն պնդումները, թե ինձ ընտրում են այդ բանակցությունները վարելու համար, պարզապես փլվում են»,– ասել է նա։

Ռուբինյանի խոսքով՝ նման հայտարարությունները նաև անհարգալից են Հայաստանի ժողովրդի նկատմամբ, քանի որ երկրի պաշտոնյաները ընտրվում են ժողովրդի քվեով՝ խորհրդարանական մեծամասնության միջոցով։

Հարցին, թե ով կարող է իրեն փոխարինել Հայաստան-Թուրքիա կարգավորման գործընթացում հատուկ ներկայացուցչի պաշտոնում, Ռուբինյանը պատասխանել է, որ այդ հարցում դեռ որոշում չկա, և համապատասխան թեկնածուին կորոշեն վարչապետն ու կառավարությունը։