Դա անհեթեթություն է. Ալեն Սիմոնյանը՝ նախագահի թեկնածու լինելու մասին

 ԱԺ նախագահ Ալեն Սիմոնյանը լրագրողների հետ ճեպազրույցում հերքեց շրջանառվող տեղեկություններն այն մասին, թե իշխանություններն իրեն դիտարկում են որպես Հայաստանի նախագահի պաշտոնի թեկնածու։

Այսօր լրագրողների հետ ճեպազրույցի ժամանակ ԱԺ նախագահ Ալեն Սիմոնյանը հերքեց շրջանառվող լուրերը, թե իշխանություններն իրեն դիտարկում են որպես Հայաստանի նախագահի պաշտոնի թեկնածու։ Նա լուրերը որակեց որպես «անհեթեթություն»: 

«Դա անհեթեթություն է: Ես նման բան չեմ մտածում, երբևիցե որևիցե մեկի հետ նման խոսակցություն չեմ ունեցել, կոռեկտ չեմ համարում: Հայաստանի Հանրապետությունը ունի նախագահ։ Ի դեպ, ասեմ, որպես քաղաքացի, իմ ամենասիրված, իմ կողմից ամենահարգված նախագահն է, որին ես շատ սիրում, շատ հարգում եմ և նման խոսակցությունները ուղղակի անհեթեթություն են»,- հայտարարեց Ալեն Սիմոնյանը՝ հերքելով լուրերը, թե նման բան քննարկել է ինչ-որ մեկի հետ: Ինչ վերաբերում է ակտիվ քաղաքականությանը, Սիմոնյանը հայտարարեց՝ ակտիվ քաղաքականությունից չի հեռանա. ««Իմ պես քաղաքական գործիչները շա՞տ են քաղաքական դաշտում, որ ես քաղաքական դաշտը լքեմ, թողնեմ, այսպես ասած, եռագլուխ միավորմանը, որպեսզի շարունակեն Հայաստանի Հանրապետությունը բզկտել։ Ես քարոզարշավի մեջ եմ եղել և մեր քաղաքացիներին իմ գործընկերների հետ և վարչապետի հետ միասին բան եմ խոստացել, հիմա իմ խրամատը ես հինգ տարի այստեղ պահեցի, մեկ այլ տեղ իմ խրամատը կշարունակեմ պահել։ Ի՞նչ է փոխվել, ոչ մի պաշտոն հավերժ չի, և փառք Աստծո»,- ասաց Սիմոնյանը: