ՏԵՍԱՆՅՈՒԹ․ Մեր հարուր հազարավոր հայրենակիցներ զրկվելու են ընտրելու իրավունքից․ Գեղամ Մանուկյան

ԱԺ «Հայաստան» խմբակցության պատգամավոր Գեղամ Մանուկյանը քննադատել է ընտրական օրենսդրության փոփոխությունների նախագիծը՝ պնդելով, որ այն ներկայացվել է առանց լիարժեք հանրային քննարկումների և անհրաժեշտ փորձագիտական եզրակացությունների։

Նրա խոսքով՝ թեև իշխանությունները հայտարարում են, որ նախագիծն անցել է հանրային քննարկման փուլ, ինքը տեղեկություն չունի, թե դրանք ինչ ձևաչափով են անցկացվել։ 

Պատգամավորը նաև նշել է, որ քննարկումների ընթացքում բարձրացված հարցերին, այդ թվում՝ Ազգային ժողովի փորձագիտական գրասենյակի եզրակացության առկայության վերաբերյալ, պատասխանել են, թե «դեռ ժամանակ կա»։ Սակայն, ըստ նրա, նախագիծն արդեն ներկայացվել է խորհրդարան, մինչդեռ այդ փորձագիտական եզրակացությունը դեռևս բացակայում է։

Գեղամ Մանուկյանի խոսքով՝ հանրային քննարկումների արդյունավետության մասին նույնպես հարցեր կան, քանի որ, ինչպես նշեց նա, նախօրեին հասարակական կյանքի ակտիվ մի շարք կազմակերպություններ հանդես են եկել միասնական հայտարարությամբ՝ պնդելով, որ նախագիծը հակասահմանադրական է։

Ընդդիմադիր պատգամավորը կարծում է, որ նախագիծը խորհրդարան է ներկայացվել հապշտապ, և դա, ըստ նրա, պայմանավորված է քաղաքական նպատակներով։ Մանուկյանի գնահատմամբ՝ փոփոխությունները կարող են ազդել հարյուր հազարավոր քաղաքացիների ընտրական իրավունքի վրա։

«Այս շտապողականությունը ուրիշ ձև չի կարելի բացատրել, քան քաղաքական հետին նպատակներ ունենալը․ այն առնչվելու է մեր հարուր հազարավոր հայրենակիցների, որոնք զրկվելու են Հայաստանում ընտրությունների մասնակցելու հնարավորությունից:»,- նշել է Գեղամ Մանուկյանը