ՌԴ-ում օտարերկրացիներին կհետևեն կենսաչափական տվյալներով․ Մեդվեդևի նոր առաջարկը

ՌԴ Անվտանգության խորհրդի փոխնախագահ Դմիտրի Մեդվեդևը հայտարարել է, որ օտարերկրացիների կենսաչափական տվյալներով նույնականացման համակարգը, որն այժմ գործում է պետական սահմանի անցակետերում, պետք է տարածվի Ռուսաստանի ամբողջ տարածքում։

Նրա խոսքով՝ անհրաժեշտ է ապահովել նաև օտարերկրյա քաղաքացիների, այդ թվում՝ անչափահասների, հաշվառումն ու գտնվելու վերահսկողությունն երկրում։ Բացի այդ, միջգերատեսչական հանձնաժողովի նիստում քննարկվել են հարկերից խուսափող աշխատանքային միգրանտների և նրանց գործատուների հայտնաբերման հարցերը։

Կենսաչափական նույնականացման փորձնական ծրագիրը մեկնարկել է 2024 թվականի դեկտեմբերի 1-ին։ Սկզբում այն կիրառվել է Մոսկվայի միջազգային օդանավակայաններում և Օրենբուրգի մարզի «Մաշտակովո» ավտոմոբիլային անցակետում։

2025 թվականի հունիսի 30-ից մեկնարկել է ծրագրի նոր փուլը, որի համաձայն՝ առանց վիզայի Ռուսաստան մեկնող օտարերկրացիները պետք է ուղևորությունից առնվազն 72 ժամ առաջ էլեկտրոնային հայտ ներկայացնեն՝ նշելով այցի նպատակը և տրամադրելով կենսաչափական տվյալներ։

2025 թվականի դեկտեմբերի 1-ից, տեխնիկական հնարավորության առկայության դեպքում, կենսաչափական տվյալների հավաքագրման փորձնական ծրագիրը տարածվել է Ռուսաստանի պետական սահմանի բոլոր անցակետերի վրա։