Տոկիոն ճանաչվել է աշխարհի ամենահարմարավետ քաղաքը բնակության համար

Ճապոնիայի մայրաքաղաք Տոկիոն ճանաչվել է աշխարհի ամենահարմարավետ քաղաքը բնակության համար։ Այս մասին հայտնում է Euronews-ը⁠։ 

Վարկանիշում երկրորդ տեղը զբաղեցրել է Դանիայի մայրաքաղաք Կոպենհագենը, իսկ երրորդը՝ Պորտուգալիայի մայրաքաղաք Լիսաբոնը։ Լավագույն հնգյակում ընդգրկվել են նաև Ավստրիայի մայրաքաղաք Վիեննան և Ավստրալիայի Սիդնեյը։ Առաջին տասնյակում են նաև Ցյուրիխը, Մադրիդը, Փարիզը, Մյունխենը և Օսլոն։

Monocle-ի 2026 թվականի լավագույն 10 քաղաքները

Տոկիո (Ճապոնիա)
Կոպենհագեն (Դանիա)
Լիսաբոն (Պորտուգալիա)
Վիեննա (Ավստրիա)
Սիդնեյ (Ավստրալիա)
Ցյուրիխ (Շվեյցարիա)
Մադրիդ (Իսպանիա)
Փարիզ (Ֆրանսիա)
Մյունխեն (Գերմանիա)
Օսլո (Նորվեգիա) 

Հետազոտության շրջանակում ուսումնասիրվել է աշխարհի 75 քաղաք, որոնցից 13 եվրոպական քաղաք ընդգրկվել է լավագույն 20-ում։ Միևնույն ժամանակ Հելսինկին, Ամստերդամը և Բարսելոնան նույնպես հայտնվել են ցանկում, սակայն զբաղեցրել են վերջին հորիզոնականները, Հայաստանի որևէ քաղաք ցանկում չի եղել:

Վարկանիշը կազմելիս հաշվի են առնվել ոչ միայն տնտեսական ցուցանիշները, այլև բնակիչների առօրյա կյանքի որակը բնութագրող բազմաթիվ գործոններ՝ անվտանգության մակարդակը, հասարակական տրանսպորտի զարգացվածությունը, կանաչ գոտիների առկայությունը, առևտրի և ռեստորանային ոլորտի զարգացումը, քաղաքային ենթակառուցվածքները, քաղաքական կայունությունն ու ընդհանուր հարմարավետությունը։ 

Հրապարակման համաձայն՝ Կոպենհագենը եվրոպական քաղաքների շարքում պահպանել է առաջատար դիրքը՝ զարգացած հեծանվային ենթակառուցվածքների, հանրային տարածքների, ռեստորանային մշակույթի և բնակիչների կյանքի բարձր որակի շնորհիվ։ Լիսաբոնը բարձր գնահատականներ է ստացել արևոտ կլիմայի, ճարտարապետության, անվտանգության և զարգացած առևտրային միջավայրի համար, թեև փորձագետները նշել են, որ քաղաքի գլխավոր խնդիրներից շարունակում է մնալ բնակարանների բարձր արժեքը։ Իսկ Վիեննան առանձնացել է սոցիալական բնակարանաշինության ծրագրերով, միջազգային միջոցառումների անցկացման փորձով և զարգացած հանրային ենթակառուցվածքներով։