ԱՄՆ ռազմարդյունաբերությունը ստացել է 300 միլիարդ դոլարի պատվերներ ՆԱՏՕ-ի դաշնակիցներից

ՆԱՏՕ-ի եվրոպական անդամ երկրներն ու Կանադան ամերիկյան ռազմարդյունաբերական համալիրի ընկերություններում մոտավորապես 300 միլիարդ դոլարի պատվերներ են կատարել։

Այս մասին Financial Times պարբերականի հետ զրույցում տեղեկացրել է ՆԱՏՕ-ի գլխավոր քարտուղար Մարկ Ռյուտեն՝ հուլիսի 7-8-ին Անկարայում կայանալիք դաշինքի գագաթնաժողովից առաջ, հայտնում է ՌԻԱ Նովոստի-ն:

«Եվրոպացիների և կանադացիների կողմից ԱՄՆ-ում տեղադրված պատվերների ընդհանուր ծավալը, որոնք պետք է իրականացվեն առաջիկա տարիներին, այժմ կազմում է 300 միլիարդ դոլար։ Բացի այդ, եվրոպական և կանադական ներդրումներն ամերիկյան պաշտպանական արդյունաբերության մեջ արդեն իսկ աջակցում են ԱՄՆ-ում 195 հազար աշխատատեղի»,- նշել է նա։

Սպասվում է, որ Անկարայում կայանալիք ՆԱՏՕ-ի գագաթնաժողովի կենտրոնական թեմաներից մեկը դառնալու է դաշինքի անդամ պետությունների պաշտպանական արտադրության ընդլայնումը։ ԱՄՆ նախագահ Դոնալդ Թրամփի կողմից հնչեցված քննադատությունից և պահանջներից հետո դաշնակիցները էականորեն ավելացրել են սեփական ռազմական ծախսերը, սակայն միևնույն ժամանակ նոր պատվերների զգալի հատվածը բաժին է ընկնում հենց ամերիկյան սպառազինություն արտադրողներին։