AZAL-ի կործանման շուրջ Մոսկվան նոր հայտարարություն է արել

Մոսկվան ու Բաքուն լիովին հարթել են բոլոր խնդիրները՝ կապված 2024 թվականի դեկտեմբերին Ակտաուի մոտակայքում Ադրբեջանական ավիաուղիների (AZAL) օդանավի վթարի հետ։

Ռուսաստանի փոխարտգործնախարար Միխայիլ Գալուզինը RTVI-ին տված հարցազրույցում հայտնել է, որ ադրբեջանական ավիալայների կործանման հետևանքներին առնչվող բոլոր խնդիրները կարգավորված են։ Նա նաև նշել է. «Գիտեք, մենք կարգավորել ենք ադրբեջանական ավիալայների կործանման հետևանքների հետ կապված բոլոր հարցերը։ Բայց այդ հարցերը վերաբերում են, ինքներդ եք հասկանում, կոնկրետ մարդկանց, ովքեր ծանր ողբերգություն են ապրել, անդառնալի կորուստ են կրել։ Ուստի ես, անկեղծ ասած, չէի ցանկանա այստեղ մանրամասների մեջ խորանալ»։

Օդանավի վթարը տեղի է ունեցել 2024 թվականի դեկտեմբերի 25-ին։ Բաքվից դեպի Գրոզնի թռչող Embraer 190 լայները եղանակային վատ պայմանների պատճառով վերաուղղորդվել էր Մախաչկալա, որից հետո անձնակազմը որոշել էր ուղևորվել Ակտաու։ Քաղաքից մի քանի կիլոմետր հեռավորության վրա տեղի ունեցած աղետի հետևանքով ինքնաթիռում գտնվող 67 անձանցից 38-ը զոհվել են։