Ադրբեջանից բաց նամակ՝ ֆոն դեր Լայենին. ինչ են պահանջում

Ադրբեջանցի քաղբանտարկյալների և հասարակական գործիչների մի խումբ բաց նամակով դիմել է Եվրահանձնաժողովի նախագահ Ուրսուլա ֆոն դեր Լայենին՝ հուլիսի 1-ին Ադրբեջան կատարելիք նրա այցի նախաշեմին։ Դրա մասին հայտնում են ադրբեջանական լրատվամիջոցները։

Նամակի հեղինակները ողջունել են Եվրամիության և Ադրբեջանի միջև հարաբերությունների զարգացումը, սակայն ընդգծել են, որ երկարաժամկետ համագործակցությունը չպետք է կառուցվի բացառապես ռազմավարական և տնտեսական շահերի վրա։

Նրանք Եվրահանձնաժողովի ղեկավարին կոչ են արել մարդու իրավունքների, օրենքի գերակայության և հիմնարար ազատությունների հարցերը դարձնել ադրբեջանական ղեկավարության հետ բանակցությունների կենտրոնական թեմաներից մեկը, ինչպես նաև պահանջել բոլոր քաղբանտարկյալների անհապաղ և անվերապահ ազատ արձակումը։

Բացի դրանից, նամակի հեղինակները հույս են հայտնել, որ ֆոն դեր Լայենի այցի ծրագիրը կներառի հանդիպումներ անկախ լրագրողների, բլոգերների, իրավապաշտպանների և քաղաքացիական հասարակության ներկայացուցիչների հետ, որոնք շարունակում են աշխատել՝ չնայած ճնշումներին ու վտանգներին։ Նրանց կարծիքով՝ նման քայլը ցույց կտա ԵՄ հանձնառությունը ոչ միայն ռազմավարական գործընկերությանը, այլև ժողովրդավարական արժեքների պաշտպանությանը։