Հիմա ինձ մի փոքր միևնույնն է այդ հանդիպումը Ֆրանսիայի դեմ. Հալանդ

Նորվեգիայի ազգային հավաքականի հարձակվող Էրլինգ Հալանդը կիսվել է տպավորություններով Աշխարհի առաջնության խմբային փուլի 3-րդ տուրում Ֆրանսիայի ընտրանու դեմ կայանալիք մրցավեճի վերաբերյալ։

Այսօր՝ հունիսի 23-ին, Նորվեգիայի թիմը ԱԱ-ի խմբային փուլի երկրորդ տուրի շրջանակում 3:2 հաշվով հաղթել է Սենեգալի հավաքականին և ժամանակից շուտ նվաճել փլեյ-օֆֆի ուղեգիր։ Այդ խաղում դուբլ ձևակերպած 25-ամյա Հալանդը ճանաչվել է հանդիպման լավագույն ֆուտբոլիստ։

«Անկեղծ ասած, հիմա ինձ մի փոքր միևնույնն է այդ հանդիպումը [Ֆրանսիայի դեմ]: Մենք կարողացանք դուրս գալ հաջորդ փուլ, ինչն ուղղակի անհավանական է: Նրանք, ամենայն հավանականությամբ, կհաղթեն մեզ, և ամենայն հավանականությամբ, կդառնան մրցաշարի հաղթող»,- Սենեգալի հետ խաղի ավարտից հետո տված ֆլեշ-հարցազրույցում նշել է հարձակվողը։

Խմբային փուլի եզրափակիչ՝ երրորդ տուրում, Նորվեգիայի ընտրանին ուժերն է չափելու Ֆրանսիայի հետ, իսկ Սենեգալի թիմը կհանդիպի Իրաքի հավաքականին։ Զույգ խաղերն էլ նախատեսված են հունիսի 26-ին։