«Ուժեղ Հայաստան» դաշինքը պահանջում է չեղարկել խորհրդարանական ընտրությունների արդյունքները

«Ուժեղ Հայաստան» կուսակցությունը հայտարարել է, որ այսօր ժամը 18:00-ին Կենտրոնական ընտրական հանձնաժողովի շենքի մոտ բողոքի ակցիա է իրականացնելու՝ պահանջելով հունիսի 7-ի խորհրդարանական ընտրությունների արդյունքների չեղարկումը։

Կուսակցության տարածած հայտարարության մեջ նշվում է, որ այսօր ժամը 18:00-ին ԿԸՀ-ն քննելու է «Ուժեղ Հայաստան» դաշինքի դիմումը՝ ընտրությունների արդյունքներն անվավեր ճանաչելու վերաբերյալ։ Դաշինքն այս դիմումը ներկայացրել է՝ հիմք ընդունելով ընտրությունների նշանակման օրվանից մինչև քվեարկության ավարտը, ինչպես նաև ձայների հաշվարկի և վերահաշվարկի փուլերում տեղ գտած համատարած ու համակարգային խախտումները։

Ըստ հայտարարության՝ ԿԸՀ կողմից ակնհայտ անօրինական գործիքակազմերի իրացումը ուղիղ ազդեցություն է ունեցել քաղաքական ուժերի ձայների հարաբերակցության վրա, մասնավորապես՝ «Բարգավաճ Հայաստան» կուսակցության դեպքում, ինչն էլ իր հերթին ամբողջության մեջ էապես ազդել է ընտրությունների վերջնական արդյունքների վրա։ Քաղաքական ուժը հայտնում է, որ ԿԸՀ շենքի մոտ հնչեցնելու է իր բողոքի ձայնն արձանագրված ապօրինությունների դեմ։