Բելառուսից կասկածելի ԱԹՍ-ը՝ Լիտվան փակել է օդային տարածքը․ ՆԱՏՕ-ի կործանիչները օդ են բարձրացել

Լիտվայի արևելյան սահմանամերձ գոտում, ինչպես նաև Վիլնյուսի շրջանում հայտարարվել է օդային վտանգի բարձր մակարդակ, ինչից հետո երկրի ռազմական գերատեսչությունը գործարկել է ՆԱՏՕ-ի արձագանքման հատուկ ընթացակարգերը։

Ռադարների միջոցով Բելառուսի տարածքից դեպի Լիտվայի սահման շարժվող կասկածելի ԱԹՍ-ի հայտնաբերումից անմիջապես հետո օդ են բարձրացվել մերձբալթյան երկրների տարածքը հսկող դաշնակցային կործանիչները։ 

Անվտանգության նկատառումներից ելնելով՝ տեղական ժամանակով ժամը 10:00-ից ամբողջությամբ փակվել է Վիլնյուսի միջազգային օդանավակայանի օդային տարածքը, չվերթները ժամանակավորապես կասեցվել են կամ ուղղորդվել այլ օդանավակայաններ: 

Սահմանափակումները դիպել են նաև վերգետնյա հաղորդակցությանը. երկրի որոշակի հատվածներում դադարեցվել է գնացքների երթևեկությունը, իսկ կայարաններում և խորհրդարանի շենքում գտնվող մարդկանց իշխանությունները տարհանել են հատուկ ապաստարաններ: Լիտվայի պաշտպանության նախարարության և ճգնաժամային կառավարման կենտրոնի փոխանցմամբ՝ բնակչությանը հեռախոսային կարճ հաղորդագրություններով նախազգուշացնելը ստանդարտ կանխարգելիչ քայլ է։ Զինվորականները նշում են, որ սա վերջին օրերին տարածաշրջանում արձանագրված առաջին դեպքը չէ. նմանատիպ միջադեպեր վերջերս գրանցվել էին նաև հարևան Լատվիայում և Էստոնիայում: