ԱՀԿ-ն հայտնաբերված նոր վիրուսի` «Հանտավիրուս»-ի ախտանշանների և ռիսկերի մասին

Առողջապահության համաշխարհային կազմակերպության գլխավոր տնօրեն Թեդրոս Ադհանոմ Գեբրեյեսուսը հայտարարել է, որ հանտավիրուսը նոր COVID-19 չէ։

X սոցիալական հարթակի իր էջում ԱՀԿ ղեկավարը դիմել է Տեներիֆեի բնակիչներին՝ անդրադառնալով MV Hondius նավում հայտնաբերված Andes հանտավիրուսի շտամին։ Նա ընդգծել է, որ չնայած իրավիճակի լրջությանը, հանրային առողջապահությանը սպառնացող ներկայիս վտանգը ցածր է գնահատվում։ Գեբրեյեսուսը նշել է, որ թեև «համաճարակ» եզրույթը մարդկանց մոտ արթնացնում է 2020 թվականի պանդեմիայի հիշողությունները, սակայն սա նոր կորոնավիրուս չէ։

Ըստ ԱՀԿ ղեկավարի՝ կազմակերպության կողմից իրականացված պատասխանատու գնահատումը ցույց է տալիս, որ Տեներիֆեի բնակիչների բնականոն կյանքի համար ռիսկերը ցածր են։ Ներկա պահին նավում հիվանդության ախտանշաններ ունեցող անձինք չկան։

«ԱՀԿ փորձագետներն աշխատում են նավի վրա, ապահովված են բժշկական պարագաներով, իսկ Իսպանիայի իշխանությունները մշակել են ուղևորների անվտանգ տարհանման փուլային պլան։ Ըստ պլանի՝ ուղևորներին կտեղափոխեն Գրանադիլյա արդյունաբերական նավահանգիստ, որը գտնվում է բնակավայրերից հեռու, որից հետո փակ և հսկվող տրանսպորտով, ամբողջությամբ վերահսկվող երթուղով նրանց կուղարկեն ուղիղ իրենց երկրներ»,- հայտնել է նա։ 

Գլխավոր տնօրենը հավաստիացրել է, որ բնակիչների և ուղևորների միջև որևէ շփում չի նախատեսվում։