Փեզեշքիանը հանդես է եկել պայմանով. ԱՄՆ-ից դեռ արձագանք չկա

Իրանի նախագահ Մասուդ Փեզեշքիանը հայտարարել է, որ Հորմուզի նեղուցի ամբողջական բացման շուրջ քննարկումները հնարավոր են միայն ԱՄՆ-ի կողմից իրականացվող ծովային շրջափակման վերացման դեպքում։

Ֆրանսիայի նախագահ Էմանուել Մակրոնի հետ հեռախոսազրույցի ժամանակ Իրանի առաջնորդ Մասուդ Փեզեշքիանը ներկայացրել է իսլամական հանրապետության դիրքորոշումը։ Իրանի նախագահի մամուլի ծառայության տելեգրամյան ալիքի փոխանցմամբ՝ նա մասնավորապես ասել է. 

«Հորմուզի նեղուցի ամբողջական բացման վերաբերյալ ցանկացած բանակցություն պահանջում է ԱՄՆ-ի ծովային շրջափակման վերացում, և այդ քայլը անհրաժեշտ է հաշվի առնել»,- ասել է Իրանի նախագահը:

Հիշեցնենք, որ փետրվարի 28-ից Միացյալ Նահանգներն ու Իսրայելը սկսել էին հարվածներ հասցնել Իրանի տարածքում գտնվող թիրախներին, ինչի հետևանքով զոհվել է ավելի քան 3 հազար մարդ։ Ապրիլի 8-ին Վաշինգտոնն ու Թեհրանը հայտարարել էին երկշաբաթյա հրադադարի մասին, սակայն դրան հաջորդած Իսլամաբադի բանակցությունները արդյունք չտվեցին։ Թեև ռազմական գործողությունների վերսկսման մասին տեղեկություններ չկան, ԱՄՆ-ն ձեռնամուխ է եղել իրանական նավահանգիստների շրջափակմանը։ Ներկայում միջնորդ կողմերը ջանքեր են գործադրում բանակցային նոր գործընթաց կազմակերպելու ուղղությամբ։