ՏԵՍԱՆՅՈՒԹ. Եվրոպան չափազանց մեծ կախվածություններից դասեր է քաղել. ֆոն դեր Լայեն

Ուրսուլա ֆոն դեր Լայենը Երևանում հայտարարել է Եվրամիության էներգետիկ և պաշտպանական կախվածությունների հաղթահարման անհրաժեշտության մասին։

Երևանում ընթացող Եվրոպական քաղաքական համայնքի գագաթնաժողովի ժամանակ Եվրահանձնաժողովի նախագահ Ուրսուլա ֆոն դեր Լայենը նշել է, որ եվրոպական համայնքը դաս է քաղել չափազանց մեծ կախվածությունների պատճառով ստեղծված խոցելիությունից։ Նա ընդգծել է, որ ներմուծված հանքահումքային վառելիքից կախվածությունը ցավալի գործընթաց էր, ինչը Մերձավոր Արևելքի հակամարտության պայմաններում դարձել է փակուղային խնդիր և վնասում է մրցունակությանը։ Ըստ պաշտոնյայի՝ անհրաժեշտ է էներգետիկ կախվածությունը կապել ներքին արտադրության վերականգնվող էներգիայի աղբյուրների հետ և «էլեկտրականացնել ԵՄ-ն»՝ անկախությունն ապահովելու նպատակով։

Որպես երկրորդ հիմնական մարտահրավեր ֆոն դեր Լայենը մատնանշել է անվտանգությունն ու պաշտպանությունը։ Նա տեղեկացրել է, որ մինչև 2030 թվականը հավաքագրվելու է 800 մլրդ եվրո՝ ոլորտի բացերը լրացնելու և կանխարգելման համակարգեր ունենալու համար, որպեսզի Եվրոպան կարողանա ինքնուրույն պաշտպանվել։

Եվրահանձնաժողովի նախագահը հավելել է, որ Եվրոպայի անկախությունը չի նշանակում մեկուսացում, այլ ենթադրում է համագործակցություն համախոհ գործընկերների հետ։ Այդ համատեքստում նա կարևորել է մատակարարման կայուն շղթաների ստեղծումն ու ազատ առևտրի համաձայնագրերի ցանցի ակտիվացումը Լատինական Ամերիկայից մինչև Հնդկաստան։