Փաշինյանը՝ զինծառայության ժամկետի կրճատման որոշումը փոփոխելու հնարավորության մասին

Հայաստանի վարչապետ Նիկոլ Փաշինյանն անդրադարձել է զինվորական ծառայության ժամկետի կրճատման որոշումը նաև 2026 թվականի հունվարից առաջ զորակոչված զինծառայողների վրա տարածելու հնարավորության մասին հարցին։ Վարչապետը թեմային անդրադարձել է Գեղարքունիքի մարզի Վարդենիս համայնքի Գեղամասար բնակավայրում՝ պատասխանելով զինծառայողի ծնողի հարցին։

Բնակչի հարցին, թե արդյոք հնարավո՞ր չէ նաև 2026 թվականի հունվարից առաջ զորակոչվածների համար էլ ծառայության ժամկետը դարձնել 1.5 տարի՝ 2 տարվա փոխարեն, Փաշինյանն ասել է.

«Այդ հարցը լուծում չունի։ Չենք կարող, ծառայության պլան կա։ Դա կնշանակի բանակի ֆունկցիոնալությունը ջարդել, թողեք այդ տղաները հանգիստ ծառայեն, հետ գան։ Խաղաղության պայմաններում հանգիստ, նորմալ ծառայում են, լարում պետք չի մտցնել այս թեմայով»,- ասել է նա։

Նա նշել է, որ այդ հարցը քննարկել է պաշտպանության նախարարի հետ, քննարկման արդյունքում եկել են եզրահանգման, որ այդպիսի որոշում չեն կարող կայացնել։ 

Վարչապետը հավելել է, որ զինծառայության ժամկետը կրճատելը եղել է «Քաղաքացիական պայմանագիր» կուսակցության նախընտրական խոստումը 2021 թվականին։

«Ինչո՞ւ ենք որոշել ժամկետը կրճատել 2026 թվականի հունվարի 1-ից, որովհետև այդ ժամանակ էր, որ մենք «Պաշտպան հայրենյաց» ծրագրով այնքան պայմանագրայիններ ունեինք, որ կարող էինք դա անել։ Լարում մի ստեղծեք, թողեք այդ տղաները հանգիստ ծառայեն։ Հասկանո՞ւմ եք, նրանք ծառայության մեջ գտնվող մարդիկ են, այդ զինվորներին դնում եք նյարդերի վրա։ Զինվորները գիտեն, որ նման խոսակցություններ են գնում, հազարավոր զինվորների նյարդի վրա եք դնում, դա կարող է հետևանքներ ունենալ, ես ձեզ խոստանում եմ՝ մի անգամ էլ նախարարին կկանչեմ, եթե որևէ տարբերակ կա լուծելու, կլուծենք»,- եզրափակել է  Փաշինյանը։

Հավելենք՝ Հայաստանում պարտադիր զինվորական ծառայության ժամկետը 2026 թվականի հունվարի 1-ից կրճատվել է՝ դառնալով 1.5 տարի՝ 2 տարվա փոխարեն։ Որոշումը տարածվում է 2026 թվականի հունվարի 1-ից հետո զորակոչված զինծառայողների վրա, իսկ դրանից առաջ զորակոչվածները կծառայեն 2 տարի ժամկետով։ Վերջին օրերին զինծառայողների մի խումբ ծնողներ բողոքի ակցիաներ են անցկացնում Պաշտպանության նախարարության մոտ՝ պահանջելով, որպեսզի այդ որոշումը տարածվի նաև 2026 թվականի հունվարից առաջ զորակոչվածների վրա։