Առաջարկում է սահմանափակել օնլայն կազինոների հասանելիությունը․ պատգամավոր

Ազգային ժողովի տնտեսական հարցերի մշտական հանձնաժողովում «Քաղաքացիական պայմանագիր» խմբակցության պատգամավոր Հայկ Սարգսյանը ներկայացրել է «Խաղային գործունեության կարգավորման մասին», «Շահումով խաղերի, ինտերնետ շահումով խաղերի և խաղատների մասին» ու «Վիճակախաղերի մասին» օրենքներում փոփոխությունների նախագիծը։ 

Ըստ պատգամավորի ներկայացրած տվյալների՝ վերջին 8 տարում ինտերնետ կազինոներում կատարված խաղադրույքների ծավալներն աճել են ավելի քան 35 անգամ։ Եթե 2017-ին այդ ցուցանիշը 0․2 տրիլիոն դրամ էր, ապա 2025-ին այն հասել է 7․4 տրիլիոն դրամի։ Սարգսյանը նշել է, որ ոլորտը դարձել է սոցիալական չարիք, քանի որ հարյուր հազարավոր քաղաքացիներ 24-ժամյա հասանելիության պատճառով չեն կարողանում հաղթահարել կախվածությունը և վատնում են իրենց միջոցները։

Պատգամավորի խոսքով՝ մարդիկ ծախսում են աշխատավարձերը, թոշակներն ու նպաստները, իսկ կորուստները վերականգնելու հույսով կուտակում են վարկեր և պարտքեր։ Սա հանգեցնում է գողությունների, հանցագործությունների, ամուսնալուծությունների և ինքնասպանությունների։

Առաջարկվող լուծումները ներառում են վեց հիմնական կետ․

1. Օնլայն կազինոների կայքերում պարտադիր «ինքնաարգելափակման կոճակի» առկայություն, որով անձը կարող է 5 տարով արգելել իր մասնակցությունը խաղերին։
2. Արգելք նպաստառուների համար։
3. Սահմանափակում այն անձանց համար, որոնց միակ եկամուտը կենսաթոշակն է։
4. Արգելք սնանկության վարույթում գտնվող քաղաքացիներին։
5. Սահմանափակում պետական բյուջեի ծրագրերից օգտվողների համար։
6. Խաղային մասնակցության առավելագույն շեմի սահմանում՝ տարեկան հայտարարագրված եկամտի մինչև 20%-ի չափով։