Ճապոնիայում հզոր երկրաշարժից հետո զգուշացնում են մեգա-երկրաշարժի մասին

Ճապոնիայի հյուսիսային ափամերձ գոտում տեղի ունեցած 7,5 մագնիտուդ ուժգնությամբ երկրաշարժից հետո հայտարարվել է ցունամիի տագնապ և հնարավոր ավելի հզոր աղետի նախազգուշացում։

Ճապոնիայի Սանրիկուի ափերի մոտ՝ Չիշիմա իջվածքի հարևանությամբ, տեղական ժամանակով ժամը 16:53-ին արձանագրվել է հզոր ստորգետնյա ցնցում։ Իվատե պրեֆեկտուրայի Կուջի նավահանգստում արդեն նկատվել է մոտ 80 սանտիմետր բարձրությամբ ալիք, սակայն մասնագետները չեն բացառում մինչև 3 մետր բարձրությամբ ցունամիի հավանականությունը։

Երկրի օդերևութաբանական գործակալությունն ու կառավարությունն արտակարգ հայտարարությամբ տեղեկացրել են, որ առաջիկա շաբաթվա ընթացքում կա 1% հավանականություն, որ տեղի ունեցածը կարող է հանգեցնել էլ ավելի հզոր՝ «մեգա-երկրաշարժի»։ Թեև սա հստակ կանխատեսում չէ, բայց իշխանությունները հորդորել են ափամերձ շրջանների բնակչությանը բարձրացնել զգոնությունը, թարմացնել սննդի պաշարներն ու արտակարգ իրավիճակների փաթեթները։

Ավելի քան 128,000 քաղաքացու խորհուրդ է տրվել տեղափոխվել բարձրադիր գոտիներ, թեպետ բնակչությանը կոչ է արվել շարունակել բնականոն կյանքը։ Այս պահի տվյալներով զոհերի կամ լուրջ ավերածությունների մասին զեկույցներ չեն ստացվել։