Իրանի դեմ նոր իրադարձություններ կարող են տեղի ունենալ. Նեթանյահու

Իսրայելի վարչապետ Բենիամին Նեթանյահուի պնդմամբ՝ Իրանի դեմ պատերազմը դեռևս չի ավարտվել, և ցանկացած պահի հնարավոր են նոր իրադարձություններ։

Իսրայելի կառավարության ղեկավարը նշել է, որ իր երկիրը, սերտորեն գործակցելով Միացյալ Նահանգների հետ, պայքարում է Իրանի դեմ և արդեն արձանագրել է զգալի հաջողություններ, սակայն լարվածությունը պահպանվում է։ «Մենք ապրում ենք մեծ փորձությունների և հսկայական հետևանքների ժամանակաշրջանում... Բայց սա դեռ վերջը չէ, և ցանկացած պահի կարող են տեղի ունենալ նոր իրադարձություններ»,- Արգենտինայի նախագահ Խավիեր Միլեյի հետ հանդիպմանը հայտարարել է Նեթանյահուն։

Նախօրեին ԱՄՆ նախագահ Դոնալդ Թրամփը տեղեկացրել էր ապրիլի 21-ի երեկոյան Իրանի հետ նախատեսվող բանակցությունների մասին։ Ինչպես հայտնում է իրանական ԻՌՆԱ գործակալությունը, Թեհրանը հրաժարվել է մասնակցել այդ հանդիպմանը՝ պատճառաբանելով ԱՄՆ-ի «չափազանց մեծ պահանջներն ու անիրատեսական սպասումները»։ Ըստ «Աքսիոս»-ի՝ իրանցի պաշտոնյաները կասկածներ ունեն, որ բանակցությունները կարող են քողարկված լինել նոր հարձակում իրականացնելու համար։