Դոնբասից զորքերի դուրսբերումը պարտություն է. Զելենսկի

Ուկրաինայի նախագահ Վլադիմիր Զելենսկին հայտարարել է, որ ուկրաինական բանակի դուրսբերումը Դոնբասից կդառնա Կիևի համար ռազմավարական պարտություն։ Նրա խոսքերը փոխանցում է «ՌԲԿ Ուկրաինա»-ն։

«Նրանք ցանկանում են, որ մենք դուրս գանք Լուգանսկի և Դոնեցկի մարզերից։ Իհարկե, ռազմավարական առումով դա մեզ համար պարտություն է, ռազմավարական առումով Զինված ուժերի համար դա պարտություն է։ Ամրաշինական կառույցները, պաշտպանության գիծը՝ մենք հաստատ ավելի թույլ ենք դառնում», - ընդգծել է Զելենսկին։

Մարտի վերջին նա հայտնել էր, որ Ռուսաստանը ամերիկյան կողմի հետ շփումների ընթացքում Ուկրաինային տվել է երկու ամիս՝ Դոնբասից ԶՈւ դուրս բերելու համար. «Իսկ եթե Ուկրաինան չհեռանա, ապա Ռուսաստանը կգրավի Դոնբասը, և հետո կլինեն այլ պայմաններ»:

Ռուսաստանի նախագահի մամուլի քարտուղար Դմիտրի Պեսկովը հայտարարել էր, որ Կիևը պետք է հնարավորինս շուտ որոշում ընդունի Դոնբասի տարածքից զորքերը հետ քաշելու վերաբերյալ։ 

Զելենսկու որոշումը Դոնբասից ԶՈւ դուրս բերելու մասին կբացեր ռազմական գործողությունների դադարեցման հեռանկարներ, իր հերթին նշել է Ռուսաստանի նախագահի օգնական Յուրի Ուշակովը։