Թուրքիայի ԱԳ նախարարը խոսել է «Զանգեզուրի միջանցքից»

Անկարան հույս ունի, որ Երևանի և Բաքվի միջև խաղաղության պայմանագիրն արագ կստորագրվի, ինչի մասին հայտարարել է Թուրքիայի արտաքին գործերի նախարար Հաքան Ֆիդանը։

Անթալիայի դիվանագիտական ֆորումի ավարտին տեղի ունեցած ճեպազրույցում Հաքան Ֆիդանը նշել է, որ Թուրքիան ակնկալում է Հայաստանի և Ադրբեջանի միջև խաղաղության պայմանագրի արագ ստորագրում։ Ըստ թուրք նախարարի՝ Հայաստանի, Ադրբեջանի և Թուրքիայի միջև հարաբերությունների կարգավորման գործընթացը տնտեսական օգուտներ է խոստանում։

Ֆիդանը շեշտել է, որ Միջին միջանցքի նախագծի իրականացման հարցում տարածաշրջանն ունի առանցքային դերակատարում, քանի որ Հարավային Կովկասի կայունությունը խիստ կարևոր է այդ ուղու անվտանգության համար։ Նա հավելել է, որ «Զանգեզուրի միջանցքը» Թուրքիայի համար համարվում է կարևորագույն երթուղի, և այդ թեմայով համագործակցություն է ընթանում նաև Եվրամիության հետ։

Թուրքիայի արտգործնախարարի համոզմամբ՝ Ադրբեջանի և Հայաստանի միջև խաղաղության պայմանագրի կնքումը կխթանի տարածաշրջանի բոլոր պետությունների զարգացումը, և կողմերը շատ մոտ են այդ նպատակին հասնելուն։