Բնակարանների գնում, գումարների ետվերադարձ, ապահովագրություն․ նոր նախագծեր՝ կառուցապատողների համար

Մրցակցության և սպառողների շահերի պաշտպանության հանձնաժողովում կառուցապատողների և պետական մարմինների մասնակցությամբ քննարկվել են ոլորտում առկա խնդիրներն ու օրենսդրական նոր նախագծերը:

Հանձնաժողովի նախագահ Գեղամ Գևորգյանի գլխավորությամբ տեղի ունեցած հանդիպմանը ներկա են եղել Երևանի քաղաքապետարանի, քաղաքաշինության կոմիտեի, արդարադատության նախարարության, Կառուցապատողների հայկական ասոցիացիայի և հանձնաժողովի ներկայացուցիչները։

Գեղամ Գևորգյանը հայտնել է, որ նախորդ տարի կատարված ուսումնասիրությունը վեր է հանել մի շարք խնդիրներ, որոնք վերաբերում են գովազդվող ենթակառուցվածքների չիրականացմանը, բնակարանների հանձնման ժամկետների խախտմանը և շենքերի սպասարկմանը։ Այս հարցերի կարգավորման համար լիազոր մարմիններին ներկայացվել են առաջարկներ, որոնց հիման վրա արդեն մշակվել և քննարկվում են երկու օրենքների նախագծեր։ Դրանք նպատակ ունեն ապահովել ընկերությունների բարեխիղճ գործունեությունն ու սպառողների պաշտպանությունը։

Նախատեսվող փոփոխություններով առաջարկվում է ստեղծել մասնագիտացված կառուցապատողների ինքնակարգավորվող կազմակերպություններ (ԻԿԿ), որոնք կիրականացնեն ընկերությունների վարկանիշավորում։ Սահմանվելու են թափանցիկության պահանջներ, այդ թվում՝ պաշտոնական կայքի առկայություն և պարտադիր աուդիտ։ Սնանկացման ռիսկերից խուսափելու համար նախատեսվում է գնորդների վճարած գումարների ետվերադարձի ապահովագրում՝ բանկային երաշխիքի, ապահովագրության կամ հատուկ հաշվին միջոցների սառեցման միջոցով։

Մասնակից ընկերությունների ներկայացուցիչները դրական են գնահատել նախաձեռնությունները և հանդես եկել սեփական դիտարկումներով ու առաջարկներով։