Պետեր Մադյարը մտադիր է երկխոսություն սկսել Մոսկվայի հետ

Հունգարիայում կայացած խորհրդարանական ընտրությունների նախնական արդյունքներով հաղթանակ տարած «Տիսա» ընդդիմադիր կուսակցության առաջնորդ Պետեր Մադյարը կողմ է արտահայտվել Ռուսաստանի նախագահ Վլադիմիր Պուտինի հետ պաշտոնական բանակցություններ վարելուն։ Քաղաքական գործիչն այս մասին հայտարարել է իր համակիրների հետ հանդիպման ժամանակ՝ անդրադառնալով երկրի արտաքին քաղաքականության հետագա ուղղություններին։

Մադյարի պարզաբանմամբ՝ Մոսկվայի հետ երկխոսությունը թելադրված է աշխարհագրական իրողություններով և տնտեսական գործոններով։ Նա ընդգծել է, որ ո՛չ Հունգարիայի, և ո՛չ էլ Ռուսաստանի դիրքը քարտեզի վրա չի փոխվելու, ուստի կողմերը պետք է նստեն բանակցությունների սեղանի շուրջ։ Որպես հիմնավորում քաղաքական գործիչը մատնանշել է նաև Հունգարիայի զգալի կախվածությունը ռուսական էներգակիրներից։


Հիշեցնենք` ապրիլի 12-ին կայացած ընտրությունների քվեների 98,93%-ի մշակման արդյունքներով՝ «Տիսա» կուսակցությունը ստացել է ձայների 53,07%-ը, ինչը նրան թույլ է տալիս զբաղեցնել 138 տեղ 199-տեղանոց խորհրդարանում։


Վիկտոր Օրբանի գլխավորած «Ֆիդես» կուսակցությունը հավաքել է 38,43% ձայն՝ ստանալով 55 մանդատ։ Այսպիսով, Հունգարիայում տեղի է ունեցել ուժերի հարաբերակցության էական փոփոխություն, որը կարող է ազդել պաշտոնական Բուդապեշտի հետագա դիվանագիտական կուրսի վրա։