Ուգանդայի ԶՈւ հրամանատարի արտառոց պահանջը` Թուրքիայից

Ուգանդայի զինված ուժերի հրամանատար և երկրի նախագահի որդի Մուհուզի Կայնեուգաբան հանդես է եկել սկանդալային հայտարարությամբ՝ Անկարայից պահանջելով 1 միլիարդ դոլար և կին՝ ամուսնանալու նպատակով: Գեներալը նշել է, որ միայն այս պայմանների կատարման դեպքում է պատրաստ շարունակել համագործակցությունը Սոմալիում իրականացվող ռազմական գործողությունների շրջանակում:

Հայտարարության մեջ Կայնեուգաբան շեշտել է, որ պահանջները չբավարարելու դեպքում Ուգանդայի իշխանությունները կարող են դադարեցնել դիվանագիտական հարաբերությունները և փակել Կամպալայում գործող թուրքական դեսպանատունը: Այս քայլը դիտարկվում է որպես ուղիղ վերջնագիր Անկարային, որը տարածաշրջանում ռազմավարական շահեր ունի:

Հատկանշական է, որ սա Ուգանդայի նախագահի որդու առաջին աղմկահարույց հայտարարությունը չէ: Ավելի վաղ նա հրապարակավ խոստացել էր զինված աջակցություն ցուցաբերել Իսրայելին՝ վերջինիս անվտանգությանը սպառնացող լուրջ վտանգների դեպքում: Պաշտոնական Անկարան դեռևս չի արձագանքել գեներալի առաջադրած պայմաններին: