Իսրայելը Թուրքիային դիտարկում է որպես իր նոր հակառակորդ

Թուրքիայի արտգործնախարար Հաքան Ֆիդանը հայտարարել է, որ Իսրայելը նպատակ ունի Անկարային դարձնել իր հիմնական թշնամին։

Թուրքիայի արտաքին գործերի նախարար Հաքան Ֆիդանը նշել է, որ Իսրայելի թե՛ իշխող, թե՛ ընդդիմադիր որոշ շրջանակներ ձգտում են Անկարային ներկայացնել որպես իրենց գլխավոր հակառակորդ։ «Anadolu» գործակալության հետ զրույցում դիվանագետն ընդգծել է, որ Իսրայելի քաղաքական համակարգին բնորոշ է մշտական արտաքին թշնամիների որոնումը, և Իրանից հետո այժմ փորձ է արվում այդ դերում տեսնել Թուրքիային։

Ֆիդանի խոսքով՝ այս մոտեցումը հատուկ է ոչ միայն Բենիամին Նեթանյահուի գլխավորած կառավարությանը, այլև քաղաքական դաշտի այլ գործիչների, ովքեր կիրառում են հակաթուրքական հռետորաբանություն։ Արտգործնախարարը պնդել է, որ Լիբանանի ու Գազայի հարցում Թուրքիայի որդեգրած դիրքորոշումը խոչընդոտում է Իսրայելի ծրագրերին՝ վերջինիս կանգնեցնելով բարդ իրավիճակի առաջ։

Անդրադառնալով Լիբանանի իրադարձություններին՝ թուրքական գերատեսչության ղեկավարը դրանք համարել է Իսրայելի ծավալապաշտական նկրտումների բաղկացուցիչ մաս։ Նա նախազգուշացրել է, որ Թել Ավիվի կողմից իրականացվող ագրեսիվ քայլերը, որոնք միտված են ազդեցության գոտիների մեծացմանը, կարող են հանգեցնել տարածաշրջանային լայնամասշտաբ բախման։