Շոկային բացահայտում Նեթանյահուի վերաբերյալ․ ինչ իրավիճակում է նա․ Financial Times

Իրանի հետ ձեռք բերված հրադադարը կարող է ներքաղաքական հետևանքներ ունենալ Իսրայելում և ազդել վարչապետ Բենյամին Նեթանյահուի ունեցած դիրքի վրա, հայտնում է Financial Times-ը՝ հղում անելով փորձագետների գնահատականներին։

Քաղաքական վերլուծաբան Ավիվ Բուշինսկին նշել է, որ հակամարտության սկզբում ԱՄՆ նախագահ Դոնալդ Թրամփն ու Նեթանյահուն խոսում էին Իրանում իշխանափոխության հնարավորության մասին, սակայն ներկայիս հրադադարի պայմաններում զարգացումները կարող են բերել քաղաքական փոփոխությունների հենց Իսրայելում։ Նրա խոսքով՝ իսրայելցիների շրջանում կա դժգոհություն հակամարտության արդյունքներից։

Թերթի տվյալներով՝ հրադադարից հետո անցկացված առաջին հարցումը ցույց է տվել, որ Իսրայելի բնակիչների 63 տոկոսը դժգոհ է էսկալացիայի արդյունքներից, իսկ Նեթանյահուի գործունեությանը աջակցում է բնակչության կեսից պակաս մասը։ Նշվում է նաև, որ դժգոհություն կա անգամ վարչապետին մոտ կանգնած շրջանակներում։

Վերլուծաբան Դալիա Շեյնդլինի գնահատմամբ՝ Նեթանյահուի համար խնդիր է դարձել նաև այն ընկալումը, թե ԱՄՆ նախագահը նրան ստիպել է գնալ հրադադարի։ Նա ընդգծել է, որ վերջին տարիներին բարձր մակարդակի հակառակորդների չեզոքացումը չի ապահովել բավարար քաղաքական աջակցություն։ Վերջին 18 ամիսների հարցումները ցույց են տալիս, որ Նեթանյահուի կոալիցիան խորհրդարանում կարող է ստանալ ընդամենը 49-56 մանդատ՝ 120-ից։

Միևնույն ժամանակ, Դոնալդ Թրամփը հայտարարել է, որ ԱՄՆ-ն և Իրանը համաձայնության են եկել երկշաբաթյա հրադադարի շուրջ։ Իրանի ազգային անվտանգության բարձրագույն խորհուրդը հայտնել է, որ Վաշինգտոնը համաձայնել է Թեհրանի առաջարկած պայմաններին, և առաջիկայում նախատեսվում են բանակցություններ ԱՄՆ-ի հետ Իսլամաբադում։