Իրանը նախապայմաններ է ներկայացրել ԱՄՆ-ին

 Իրանի խորհրդարանի խոսնակ Մոհամմադ Բաղեր Ղալիբաֆը սոցիալական ցանցերում գրել է, որ կողմերի համաձայնեցրած երկու կետերը դեռ չեն իրականացվել։

«Խոսքը Լիբանանում հրադադարի և բանակցությունների մեկնարկից առաջ իրանական ակտիվների ապաշրջափակման մասին է։ Այդ երկու պայմանները պետք է կատարվեն բանակցությունների մեկնարկից առաջ»,- նշել է Ղալիբաֆը։

ԱՄՆ փոխնախագահ Ջեյ Դի Վենսը արդեն մեկնել է Պակիստան, որտեղ նախատեսվում են բանակցություններ իրանական կողմի հետ։ Մեկնելուց առաջ լրագրողների հետ զրույցում նա դրական ակնկալիքներ է հայտնել սպասվող հանդիպումից՝ նշելով, որ ԱՄՆ-ը պատրաստ է կառուցողական երկխոսության, եթե մյուս կողմն էլ բարի կամք դրսևորի։

«Մենք անհամբեր սպասում ենք բանակցություններին։ Կարծում եմ, որ դրանք դրական կլինեն: Եթե իրանցիները պատրաստ են բարեխղճորեն բանակցել և օգնության ձեռք մեկնել, դա մի բան է։ Եթե նրանք փորձեն խաղալ մեզ հետ, կբացահայտեն, որ բանակցային թիմն այդքան էլ ընկալունակ չէ։ Նախագահը մեզ բավականին հստակ ցուցումներ տվեց, և մենք կտեսնենք, թե ինչ է դուրս գալիս դրանից»,- ասել է ԱՄՆ փոխնախագահը։