Իրանցիները մի բան են ասում, մեկ այլ բան անում. Սպիտակ տան խոսնակ

Սպիտակ տունը հայտարարել է, որ Հորմուզի նեղուցը պետք է անհապաղ, արագ և անվտանգ բացվի։ Այդ մասին լրագրողների հետ ճեպազրույցում ասել է Սպիտակ տան մամուլի քարտուղար Քերոլայն Լիվիթը՝ մեկնաբանելով իրանական պետական լրատվամիջոցների տարածած տեղեկությունները նեղուցի կրկին փակման վերաբերյալ։

Լիվիթի խոսքով՝ ԱՄՆ նախագահը տեղեկացվել է այդ հաղորդումների մասին մինչև իր ելույթը։ Նա ընդգծել է, որ նման իրավիճակը Վաշինգտոնի համար անընդունելի է։ Սպիտակ տան ներկայացուցիչը նշել է, որ Իրանի հրապարակային հայտարարություններն ու մասնավոր շփումներում փոխանցվող տեղեկությունները միմյանց չեն համընկնում։

Նրա խոսքով՝ օրվա ընթացքում Հորմուզի նեղուցում արձանագրվել է նավային երթևեկության աճ։ Լիվիթը կրկնել է նախագահի պահանջը, ըստ որի՝ նեղուցը պետք է բաց մնա անմիջապես և անվտանգ պայմաններում։

Միևնույն ժամանակ նա ասել է, որ ԱՄՆ նախագահին մասնավոր կարգով փոխանցվել է՝ հրապարակային տարածվող տեղեկությունները կեղծ են։ Սպիտակ տունը, այսպիսով, պնդում է, որ պաշտոնական հրապարակային հայտարարություններն ու փակ խողովակներով ստացվող ազդակները հակասում են միմյանց։