Ես կասկած չունեմ, որ այդ համաձայնագիրը կստորագրվի․ Փաշինյան

Վարչապետ Նիկոլ Փաշինյանը հայտարարել է, որ ինքն ու Ադրբեջանի նախագահը խոսել են խաղաղության մասին։

«Ես չեմ խոսել հարաբերական կայունության մասին, Ադրբեջանի նախագահն էլ չի խոսել հարաբերական կայունության մասին: Ես խոսել եմ խաղաղության մասին, ինչքան տեղյակ եմ՝ Ադրբեջանի նախագահն էլ է խոսել խաղաղության մասին: Մենք խոսում ենք խաղաղության մասին»,– կառավարության նիստից հետո լրագրողների հետ ճեպազրույցում ասել է վարչապետ Նիկոլ Փաշինյանը։

Խաղաղության համաձայնագրի ստորագրման հնարավորության վերաբերյալ Նիկոլ Փաշինյանը նշել է. 

«Ինչպես առիթ ունեցել եմ ասելու, այդ ուղղությամբ լուռ, հանդարտ, հանգիստ դիվանագիտական աշխատանք է իրականացվում: Բայց ես ասեմ՝ ես կասկած չունեմ, որ այդ համաձայնագիրը կստորագրվի: Կստորագրվի ապրիլին, մայիսին, հունիսին, սեպտեմբերին թե երբ՝ դա երկրորդ խնդիրն է, բայց կստորագրվի: Շատ կարևոր է արձանագրել և թերևս առաջին անգամ է, կամ առաջին անգամ եթե չէ, հիմա արդեն ավելի հստակ է այդ համընկնումը Հայաստանի և Ադրբեջանի դիրքորոշումների, որ նույնիսկ Խաղաղության համաձայնագիրը ստորագրված չլինելու և նախաստորագրված լինելու պայմաններում խաղաղությունը հաստատված է: Մենք հիմա խոսելու ենք խաղաղությունը ամրապնդելու և խաղաղությունը հետ շրջելու անհնարինության մասին, և այս առումով կարևոր են ներքաղաքական պրոցեսները: Թե՛ Հայաստանում, թե՛ Ադրբեջանում կարևոր են, որովհետև Հայաստանում էլ կան ուժեր, ենթադրում եմ՝ Ադրբեջանում էլ կան ուժեր, որոնք այդքան էլ գոհ չեն խաղաղությունից և պիտի փորձեն հետ շրջել խաղաղությունը»։

Վարչապետը նշել է, որ Հայաստանի քաղաքացիները պետք է պաշտպանեն հաստատված խաղաղությունը և այն դարձնեն անշրջելի։

«Մենք՝ ՀՀ քաղաքացիներս, պետք է տեր կանգնենք հաստատված խաղաղությանը և այն դարձնենք անշրջելի: Երեկ ես Եվրոպական խորհրդարանի ամբիոնից առիթ ունեցա դրա մասին խոսելու»,- նշել է վարչապետը։