ԱՄՆ-ն ունի «անսահմանափակ» պաշարներ․ հնարավոր է երկարատև պատերազմ վարել․ Թրամփ

ԱՄՆ նախագահ Դոնալդ Թրամփը հայտարարել է, որ Միացյալ Նահանգների զինամթերքի պաշարները գտնվում են բարձր մակարդակի վրա և, իր փոխանցմամբ, երբեք չեն եղել այսքան մեծ։

Թրամփի խոսքով՝ իրեն տեղեկացրել են, որ երկիրը գործնականում ունի անսահմանափակ քանակի որոշ զինատեսակների պաշարներ։ Նա նշել է, որ այդ ռեսուրսներով հնարավոր է երկարատև պատերազմ վարել՝ ընդգծելով, որ ԱՄՆ զինանոցը գերազանցում է այլ երկրների ունեցած լավագույն սպառազինությունը։ Միաժամանակ նա նշել է, որ թեև ներկայիս մակարդակը բարձր է, այն դեռ չի հասել ցանկալի ցուցանիշներին։

ԱՄՆ Նախագահը հայտարարել է, որ ամերիկյան բարձրորակ սպառազինության մի մասը պահվում է արտերկրում։ Նա քննադատել է Ջո Բայդենի վարչակազմին՝ պնդելով, որ Ուկրաինային փոխանցվել է հարյուրավոր միլիարդ դոլարի զինտեխնիկա, սակայն այն չի համալրվել համապատասխան ծավալներով։

Թրամփը հավելել է, որ իր առաջին նախագահական ժամկետի ընթացքում իրականացրել է զինված ուժերի վերականգնման քայլեր և շարունակելու է այդ ուղղությամբ աշխատանքը՝ ընդգծելով ԱՄՆ պատրաստվածությունը։