Լեհաստանը պատրաստվում է «փոխհատուցման» հայց ներկայացնել Ռուսաստանի դեմ. FT
Լեհաստանը նախապատրաստում է դատական հայց Ռուսաստանի դեմ՝ կապված «խորհրդային տիրապետության» հետևանքների համար հնարավոր փոխհատուցման պահանջի հետ։ Գործընթացը նախաձեռնել է Լեհաստանի վարչապետ Դոնալդ Տուսկի հանձնարարությամբ իրականացվող ուսումնասիրությունը։
Հետաքննությունը համակարգող ինստիտուտի տնօրեն Բարտոշ Գոնդեկը նշել է, որ աշխատանքը նախատեսվում է իրականացնել լայնածավալ ձևաչափով։ Նրա խոսքով՝ այն կարող է լինել ավելի ընդգրկուն, քան նախկինում նացիստական հանցագործությունների վերաբերյալ իրականացված ուսումնասիրությունները։
Լեհաստանը 2022 թվականին պահանջել էր Գերմանիայից շուրջ 6,2 տրիլիոն զլոտի փոխհատուցում՝ Երկրորդ համաշխարհային պատերազմի պատճառած վնասների համար։ Բեռլինը հայտարարել էր, որ լրացուցիչ վճարումներ չի նախատեսում՝ ընդգծելով, որ 1953 թվականին Լեհաստանը հրաժարվել է ռեպարացիաներից։ 2024 թվականի փետրվարին Լեհաստանի նոր արտգործնախարար Ռադոսլավ Սիկորսկին հայտարարեց, որ Գերմանիայից ռեպարացիաների հարցը փակված է՝ նշելով, որ իրավական հիմքեր չկան։
Ռուսաստանի ԱԳՆ-ում Լեհաստանի հնարավոր պահանջները որակել են որպես քաղաքական բնույթի հայտարարություններ։ Կրեմլում ևս նման նախաձեռնությունները բնութագրել են որպես ռուսատյացության դրսևորում։ Մինչդեռ ռուսական կողմը բազմիցս հայտարարել է, որ նման պահանջները չեն ունենա իրավական հիմք։
