Իրանի ԱԳՆ-ն հայտարարություն է տարածել
Իրանի արտաքին գործերի նախարարության ներկայացուցիչ Իսմայիլ Բաղային հայտնել է, որ Վաշինգտոնը Իրանի հետ նախատեսվող բանակցություններից առաջ հանդիպել է ՄԱԳԱՏԷ-ի գլխավոր տնօրեն Ռաֆայել Գրոսիի հետ։ Նրա խոսքով՝ ամերիկյան կողմը նույն օրը քննարկում է ունեցել նաև Օմանի արտգործնախարարի հետ։
IRNA գործակալության փոխանցմամբ՝ Բաղային նշել է, որ ԱՄՆ-ին ներկայացվել է Թեհրանի պաշտոնական դիրքորոշումը՝ միջուկային ծրագրի, պատժամիջոցների չեղարկման և ապագա հնարավոր համաձայնագրի շրջանակների վերաբերյալ։ Իրանական կողմը ընդգծել է, որ բանակցությունները պետք է ընթանան հստակ սահմանված օրակարգով։
Նախօրեին իրանական աղբյուրը հայտնել էր, որ Թեհրանը ձևակերպել է «կարմիր գծեր» ԱՄՆ-ի հետ երկխոսության համար։ Դրանց համաձայն՝ քննարկումները կարող են վերաբերել բացառապես միջուկային թեմային, իսկ ուրանի հարստացման դադարեցումը չի դիտարկվում։ Բացի այդ, տարածաշրջանային հարցերը և հրթիռային ծրագիրը չեն ներառվի բանակցային օրակարգում։ Թեհրանը պատրաստակամություն է հայտնել դիտարկել միայն այն առաջարկները, որոնք առնչվում են միջուկային ծրագրին և պատժամիջոցների վերացմանը։
