Շատ վատ օրեր կսպասվեն Իրանին․ Թեհրանը միջուկային զենք չպետք է ունենա․ ՆԱՏՕ-ում ԱՄՆ դեսպան

ԱՄՆ նախագահ Դոնալդ Թրամփը պատրաստ է հնարավորություն տալ Իրանին հարցը կարգավորել դիվանագիտական ճանապարհով, սակայն այլընտրանքի դեպքում Թեհրանը կարող է բախվել լուրջ հետևանքների։ Այս մասին Ժնևում նախատեսվող բանակցությունների ֆոնին հայտարարել է ՆԱՏՕ-ում ԱՄՆ մշտական ներկայացուցիչ Մեթյու Ուիթաքերը։

Նրա խոսքով՝ Սպիտակ տունը պատրաստ է «իրական շանս» տալ խաղաղ կարգավորմանը, սակայն Վաշինգտոնի դիրքորոշումը մնում է անփոփոխ՝ Իրանը չպետք է ունենա միջուկային զենք կամ դրա ստեղծման ներուժ։ Ուիթաքերն ընդգծել է, որ նախագահը բազմիցս  հայտարարել է այդ մասին։

Դիվանագետը նաև նշել է, որ ռազմական հարվածի սպառնալիքը պահպանվում է այնքան ժամանակ, քանի դեռ ԱՄՆ զինված ուժերը գտնվում են Մերձավոր Արևելքում։ 

Միաժամանակ նա ընդգծել է, որ վերջնական որոշումները կայացնում է նախագահը, և առաջնահերթությունը շարունակում է մնալ հարցի խաղաղ լուծումը։ Սակայն, ինչպես նշել է Ուիթաքերը՝ եթե դիվանագիտական ջանքերը արդյունք չտան, «շատ վատ օրեր  կսպասվեն Իրանին»։