Թրամփն առաջարկում է Վաշինգտոնում կառուցել աշխարհի ամենամեծ հաղթակամարը

ԱՄՆ նախագահ Դոնալդ Թրամփը մտադիր է Ամերիկայի անկախության 250-ամյակի կապակցությամբ կառուցել «Անկախության» հաղթակամար, որը նրա գաղափարով, պետք է դառնա աշխարհում ամենամեծը։ Այս մասին գրել է CNN-ը:

Առաջարկվող կառույցի բարձրությունը կկազմի 250 ոտնաչափ՝ զգալիորեն գերազանցելով Փարիզի «Հաղթական» կամարը, որի բարձրությունը 164 ոտնաչափ է։ 

Թրամփի առաջարկած հաղթակամարը նախատեսվում է կառուցել Լինքոլնի հուշահամալիրի և Առլինգթոն հաուսի միջև ընկած հատվածում։ Նախագծի համաձայն՝ հիմնական կառուցվածքը կունենա 165 ոտնաչափ բարձրություն և լայնություն, գագաթին կլինի 25 ոտնաչափ պատվանդան, որի վրա կտեղադրվի 60 ոտնաչափ բարձրությամբ ոսկեզօծ բրոնզե «Ազատություն աստվածուհու» արձան։

Սակայն նախագիծը բախվում է լուրջ դիմադրության։ Պատմական ժառանգության պահպանության մասնագետները զգուշացնում են, որ նման մասշտաբի կառույցը կարող է փակել Լինքոլնի հուշարձանի և Առլինգթոնի ազգային գերեզմանատան միջև ընկած պատմական տեսարանները։

Բացի այդ, անվտանգության խնդիրներ են առաջանում ավիացիայի տեսանկյունից․ կառույցը գտնվում է Ռոնալդ Ռեյգանի անվան Վաշինգտոնի ազգային օդանավակայանի անմիջական հարևանությամբ, որտեղ ինքնաթիռները թռչում են ընդամենը 492 ոտնաչափ բարձրությամբ։