Փաշինյանը մանրամասնել է Իջևանով անցնող երկաթուղու վերանորոգման հարցը

Ապաշրջափակման համատեքստում այդպիսի երկաթուղի չկա, որ բացման կամ վերաբացման հարցը չի քննարկվում։ Այս մասին ԱԺ–ում կառավարության հետ հարցուպատասխանի ժամանակ հայտարարել է ՀՀ վարչապետ Նիկոլ Փաշինյանը՝ անդրադառնալով հարցին, թե արդյոք ապաշրջափակման համատեքստում Ադրբեջանի հետ քննարկվել է Իջևանը Ադրբեջանին կապող երկաթուղու վերականգնման հարցը։

«Իհարկե, քննարկվում է, բայց նաև պետք է հաշվի առնել, որ երկաթուղու նշված հատվածի մասին խոսելիս, ցավոք, Հաղարծին գյուղի հատվածում սողանք կա, որը ընդհատել է երկաթուղին։ Բայց, դա լուծելի հարց է, կախված նրանից, թե ինչպիսի հոսքեր կանցնեն այդ տեղով։ Այսինքն, եթե այդ երկաթուղին բեռնվածության ներուժ ցուցաբերի, շահութաբերության հեռանկար ունենա, դա կարող է տեղի ունենալ»,- ասել է Փաշինյանը:

Վարչապետը նաև հիշեցրել է իր երեկվա հայտարարությունը, որ հայկական բիզնեսի համար արտահանման երթուղին Ադրբեջանով բաց է։